筲箕灣東大街譚公誕小記

原來每日行到悶的東大街可以咁熱鬧精采，天氣熱到發癲，打鼓者、舞獅舞龍團、飄色小朋友，統統流晒大汗，但仍很落力專業地投入在自己崗位上。最有趣還是觀賞途人，每當長長的舞龍停下來時，媽媽爸爸就會抱住自己的仔女，穿過舞龍或「對」仔女的頭往龍身，可能是好意頭吧！現場仲有一位外籍女郎，即興和舞獅來個Crossover，一邊打鑼打鼓舞動獅頭，她就跳起天鵝湖舞來，正到痺！
傳統野，幾時都咁好睇。
阿所謂高官肥仔平，可否用心感受一下民間聲音。我求下你啦！大人！

抉擇。

這是我在公司去洗手間時所領會的。
去洗手間，當不選用尿兜，走進三選一坐廁式廁格時，十次有八次都會發現坐廁內黃色一片，即是說，上一位用者沒有沖廁。
此時你有兩個選擇：一，沖廁；二，不沖廁。兩個選擇都有問題。何解？
選擇沖廁，一拉手掣後，在鹹水湧出同時，你亦會拉下褲鏈然後解手，一般來說，屙尿時間總會比沖水長，到你完事後，想沖水嗎？Sorry，儲水缸尚未「回氣」，無水出。你大可以選擇呆站已被你沾黃的，開始飄出陣陣尿味的坐廁前，等待「回氣」完畢，然後再拉手掣。可惜，香港人秒秒鐘幾十萬上落，此行為會被視為低B，所以你大多會轉身走人。
選擇不沖廁，是令人欽佩的行為，皆因過程非等閒人能忍受得來，尿臭撲鼻，眼看著本已昏黃的液體加速轉化成深黃時，你會叮囑自己，食Lunch不要叫凍檸茶！艱苦過後，手掣一拉，眼泛淚光，你知道，自己幹了一件損己利人的善事。然而老豆教落，施恩莫望報，你不會站著等待下一位用家光臨，你會低調地離開洗手間，誰也不會向他透露半句，這種感覺是痛苦的。

人生就是這麼一回事。你一個微小的行為，足以帶來連鎖效應。

各位同事，尤其每日廁格首位用家：沖水呀！賤人！

Priceless !

「靚成咁，無話可說。」
呢句說話我曾經用來形容過柏安妮。請容許我用多次係Audrey Tautou身上，咁係靚呀嘛，咁大對眼，仲要有埋演技喎！
雖然，硬要比的話，她欠缺了Audery Hepburn的嬌俏一面，但仍然覺得她魅力四射。《珠光寶戲》（這個中文片名認真麻麻！），好睇到痺！

一年誌慶@星島

唔覺唔覺，在星島已工作一年，對於未見過世面，長期活在溫室小公司的我來說，這一年是開心和充實的。
原來報紙有字距這回事。
原來我每日都參加緊渣打跑樓梯比賽。
原來當你和同事熟稔後，佢會同你講返埋呢個月走人。
原來地產版講電話可以咁大聲。
原來東大街富城夜晚的炒公仔面可以好食成咁。
原來明星「烏」低身時，攝記的閃光燈可以光成咁，差點雙目失明。
原來黃樂文真係痴線的。
原來我個位都幾好（剛搬來時知道不是靠窗位，說了一聲「頂！」）。
原來遠傳真係咁x煩。
原來我都幾鍾意呢份工。