無線，我不是白痴呀！

一年一度台慶夜，細個時是很大件事，甚至會買定薯片汽水，一家人由頭睇到尾，每一節都覺得好好笑。
大陣仗出場巡遊，會特別留意自己喜愛的藝人在哪裡；然後龍隊和鳳隊會施展渾身解數，爭奪星煇大獎；評判團商議冠軍誰屬時，會由小生花旦，或星級紅人，或司儀，一起上演一齣鬧劇，係真係鬧劇，但又真係好好笑；然後會由當紅歌手，真係個個都有番咁上下級數的歌手，輪流唱歌，全部藝員上晒個台，一齊拍手跳舞，有一年張國榮仲拉埋被人話好似佢的郭晉安一齊唱......
這樣的台慶，好懷念。
近年，台慶一年比一年差，甚至明明在家，都不屑一看。
星期一，真係無野好做，睇晒。然後可以肯定，無線已經技窮，走到末路。
作為全台每年重點電視節目，居然一點新意都無。藝員出場又係咁；司儀多而亂；沒有競爭性的表演項目；跳舞照Dup，扮野照Dup，打鼓又係咁，最侮辱觀眾的是魔術，實在無法相信一個全港最大的電視台，會有這樣的表演；鬧劇，同某一年以山頂臘像館為題的鬧劇完全一樣，係完全一樣！
咁大個電視台，製作出一個完全無新意，無賣點的台慶節目。各位製作人，你們是當香港觀眾是白痴，你們在愚弄香港觀眾。
無線，請拿出你的良心出來，善待你的觀眾吧！
世事無有必然的，當愈來愈多藝人歌手夠膽不賣你帳，唔俾面你時；當發現全個台都無人孭到飛，要高層走在最前搞飯局時，你還在為區區二十數點收視而沾沾自喜嗎？
警鐘已經響起，請你醒醒吧！
最起碼，當番觀眾係人。
唔該晒。